Бајерн Минхен го освои Купот на Германија

Eкипата на Баjерн Минхен ја освои двојната круна во Германија откако синоќа во финалето на Купот на Олимпискиот стадион во Берлин ја победи Борусија Дортмунд со 2:0 по продолжение.

Регуларниот дел натпреварот заврши без победник 0:0, а двата гола за Бајерн ги постигнаа во вториот дел од продолжението Арјен Робен и Томас Милер.

Холандскиот интернационалец Робен по натпреварот подвлече: „Безусловно сакавме да победиме, многумина не отпишаа по последните натпревари. Факт е дека по раното освојување на првенството за жал паднавме малку. Но, сега сезоната со титулата првак, победник во Купот и полуфиналето во Лигата на шампиони е сепак прилично добра“.

„Бевме под голем притисок“, призна по натпреварот Франк Рибери. „Но тоа е така, кога играш за Бајерн. Во последните недели имавме непријатно чувство, но добро се држевме и се боревме против тоа.“

Германскиот фудбалски првак Бајерн Минхен по десетти пат во историјата на клубот ја освојува двојната круна - првенството и Купот на Германија. За Бајерн ова беше вкупно 17-ти освоен Куп во своето 20-то финале, додека Борусија Дортмунд остана со три освоени пехари во ова натпреварување.

Бајерн Минхен е единствениот клуб кој успеал да ја освои двојата круна најмалку двапати. По еднаш тоа им појде од рака на Шалке 04 и на фудбалските клубови Келн, Вердер Бремен и Борусија Дортмунд.