Возењето камион е машка работа? Во никој случај!

Абигејл Асумаду-Амоа од Гана веќе работела како возач на камион, но кога слушнала за фирмата која вработува само жени возачи, ја зграбила шансата:

„Се чувствувам толку горда. Работата многу ми помогна. Ги охрабрувам другите жени. Има компании, но фирми само со жени, тоа е првпат не само во Гана, туку во цел свет. Ги охрабрувам другите жени да се приклучат кон кампањата за оспособување жени за возачи на камиони.“

Во Ladybird Logistics работат околу 20 жени возачи. Со фирмата раководи директорката Пејин Марфо. таа вели:

„Мислам дека жените возачи се попретпазливи. Тие навистина се внимателни. Можеби е тоа женска особина, бидејќи ние секогаш мислиме на децата кои нѐ чекаат дома и не сакаме да преземаме одредени ризици.“

За Абигејл фирмата нуди шанса за работа, но дава и шанса за уривање на стереотипите поврзани со половите. Таа се надева дека ќе го трасира патот за вработување повеќе жени и во други сектори каде доминираат мажи.