ЕУ се откажа од „дигиталниот данок“

Романскиот министер за финансии Еуген Теодоровичи, чија земја претседава со Европската унија, денеска изјави дека земјите од ЕУ денеска се откажале од планираното воведување на таканаречениот „дигитален данок“ ширум Унијата поради спротиставувањето на поединечни држави.

Тој на денешниот состанок на министрите за финансии на ЕУ во Брисел истакна дека нема договор за данокот на приходите на дигиталните концерни остварени на интернет и покрај повеќемесечните преговори.

Според Теодоровичи, министрите сега ќе ги фокусираат своите напори да се постигне единствен став за реформа на дигиталното оданочување на глобално ниво. 

Повеќе:

-ЕУ со рекордна казна за Гугл

-Фејсбук призна нов проблем со податоците

Според предлогот на Европската комисија од март минатата година, државите на ЕУ требаа да наплатуваат данок од три насто на приходите на дигиталните концерни како Гугл, Амазон и Епл, кои се цел на критики за избегнување на даноците, така што своите профити ги насочуваат во државите од ЕУ со ниски даночни стапки. Меѓу нив е и Ирска, каде се наоѓа седиштето на Фејсбук за Европа.

Еврокомесарот за економија, Пјер Московиси, како и бројни други министри, говореше за „пропуштена шанса“. Тој меѓутоа истакна дека ова не е крајот и оти дигиталниот данок не е мртов.