Избори во Зимбабве

Уште на последниот предизборен собир претседателот на Зимбабве, Роберт Мугабе, не остави простор за никаков сомнеж дека се гледа како победник. Тоа и не е чудо на избори со еден кандидат. „Ние и понатаму ќе ја управаме земјата како и досега“, рече Мугабе, но за првпат најави и подготвеност за дијалог: ако победиме, нема да бидеме арогантни туку великодушни:

„Ќе бидеме отворени за сите предлози, кои ќе ни бидат понудени од другите партии. Ќе дискутираме за нив.“

Неговата стратегија е јасна: прво да се обезбеди победата, а потоа преговори од позиција на посилен. Некои набљудувачи сметаат дека потоа е можно и повлекување на Мугабе.

Опозицијата бараше укинување на фарсата

Шефот на опозицијата, Морган Цвангираи, меѓутоа подговеноста за дијалог ја услови со укинувањето на изборната фарса:

„Секој арогантен и едностран чекор во правец на овие избори нема да биде признат од нашата партија, ниту од светот.“

Мугабе не дозволи да влијаат ни барањата на повеќе африкански земји и посредувачот Табо Мбеки. Јужноафриканскиот претседател во Хараре испрати еден министер, кого Мугабе едноставно не го прими.

Посреднички обиди без резултат

Очигледно е дека посредничките напори на Мбеки за формирање преодна влада од опозицијата и владеачката партија во Зимбабве се без никаков резултат.

Додека денеска приврзениците на Роберт Мугабе со оружје в рака го надгледуваат гласањето на избирачките места, околу 300 опозиционери побараа засолниште во јужноафриканската амбасада од страв за својот живот, како што тоа претходно го направи и лидерот на опозицијата Цвангираи во холандската амбасада. Роберт Мугабе пак како победник на изборите в понеделник сака да патува во Египет, на самитот на Африканската унија. Како таму ќе реагираат на неговото присуство, прашање е.