Митровица: Не очекуваме ништо добро

Во Митровица влеговме со такси. Таксистот, Албанец од јужниот дел на градот на Ибар, раскажува: „Вчера се случи тоа убиство. Страшно! Сега треба да најдат кој го убил и веднаш да го обесат. Не е важно дали е Србин или Албанец. Знаете, таман ќе почне нормално и мирно да се живее и се случува нешто вакво. Страшно! И треба да се воведе тој Специјален суд, сите да се казнат. Бидејќи ако не се казнат сите, не можеме нормално да живееме“.

А во Северна Митровица, сенишна тишина и мир. Пред партиската зграда каде е убиен Оливер Ивановиќ, граѓаните палат свеќи. Последен поздрав со сограѓанинот. Молк, неверување, повремени лелеци. Луѓето гледаат во една точка и молчат.

Ретко кој сака да зборува со новинари. Данијела Спасојевиќ сепак коментира: „Разочарана сум, ова е целосен крах. Како поинаку да го доживеам ова? Едноставно не верувам дека постои некое подобро утре. Тој беше визионер. Не гледаме перспектива, барем не за нас младите“.

Никој веќе не се чувствува безбедно

Пред партиската зграда каде е собрано и семејството на Оливер Ивановиќ, постар господин полека се оддалечува видно потресен. Синот го води за рака. Ни вели дека одлично го познавал Ивановиќ. „Јас бев професор на факултет, тој беше мој студент. Бевме и добри пријатели. Тој беше добар човек, сѐ најдобро што може да се каже за некого, тоа може да се каже за него“, вели пензионираниот професор Драгослав Елезовиќ. 

Повеќе на темата: 

- „На Косово треба да се реагира трезвено“

- Убиството на Оливер Ивановиќ - политичка саботажа

„Од ова не може ништо добро да се очекува. Погледнете, Митровица беше жив град, сега стана град на сеништа. Јас рано утрово излегов, верувајте човек се плаши сега да помине низ улиците на Митровица, а не пак нешто друго. И јас и сите Срби чувствуваме дека загубивме голем човек кој не само во Косово, туку и во Србија, додека сме живи треба да го жалиме“, вели професорот Елезовиќ. 

Километарската редица луѓе ги зазеде улиците на Митровица за последен пат, со прошетка низ градот, да му искаже почит на лидерот на СДП. Додека колоната минува низ градот, од страна стојат мажи и жени, цели семејства. Со поглед ја следат посмртната поворка. Сѐ се одвива во тишина.

„Овде веќе никој не се чувствува безбедно“, ни раскажува 70-годишниот Пантелија Божовиќ. „Откако сум жив, тука видов сѐ и сешто. Докажавме денеска дека тој е народен човек. Нам кои останавме, ќе ни биде во срцата. Некој му го одзеде животот, тој нека дочека од Бога... А ние, ќе трпиме додека сме живи“.

Ковчегот со телото на Оливер Ивановиќ вчера беше испратен за Белград, каде денеска беше погребан во Алејата на заслужни граѓани.