Мицкоски: Владата на Заев е минато
5 ноември 2021
„Ја очекуваме оставката на Заев, која ја најави. Доколку тоа не се случи, ќе доставиме барање за гласање недоверба на Владата“, рече вечерва лидерот на ВМРО-ДПМНЕ, Христијан Мицкоски.
Тој додаде дека во игра се две опции: „Имаме две опции. Да се окрупни мнозинството и ќе се изгласа недоверба, доколку Заев тактизира со оставката. Другото е да одиме на брзи предвремени избори. Ова е мнозиство со кое се гарантира дека Владата на Заев и СДСМ е минато“, рече Мицкоски.
Претходно, тој на социјалните мрежи објави дека има обезбедено ново мнозинство во парламентот со Беса. Лидерот на ВМРО-ДПМНЕ објави фотографи од средбата со Арјанит Хоџа од Беса, Арбен Таравари од Алијансата за Албанците, претседателот на Алтернатива, Африм Гаши и Димитар Апасиев од Левица.
Повеќе: Опозицијата формираше ново парламентарно мнозинство со Беса
„Имаме ново парламентарно мнозинство. Новата иднина доаѓа, ново време и нова надеж. Нѐ чекаат силни предизвици, свесни и благодарни за поддршката заедно ќе успееме. Македонија ќе успее! Имаме ново парламентарно мнозинство“, напиша Мицкоски.
Гаши: Се собравме да докажеме дека имаме 61 пратеник
На иста линија е и изјавата на лидерот на Алтернатива, Африм Гаши, кој за телевизијата Сител појасни дека имало иницијатива за собирање потписи за интерпелација на Владата и тие како опозиција се потпишале, а потоа и се фотографирале за да докажат дека тие потписи се собрани.
„ Сега-засега тоа е единствената вест. Како ќе тече понатаму процесот, ќе видиме. Очекуваме да видиме како ќе реагираат и другите пратеници“, рече Гаши.
Според него, „процесот се одвива заради интерпелација на Владата. Ако се изгласа
недоверба, тогаш почнуваат други рокови и тогаш почнува процесот за тоа кој ќе биде мандатар, каква влада ќе се состави. Тогаш ќе седнеме пак и ќе разговараме, но е битно да знаете дека Алтернатива нема да биде дел од Влада која би се повлекла од евроалтантските процеси и интеграции... Ако некоја партија, дел од Влада, со тоа условува, ние нема да бидеме дел од таква влада“, рече Гаши.