Берлин: осомничен бегалец кој стигнал преку Балканската рута

Германскиот сојузен министер за внатрешни работи Томас де Мезие уште ноќеска изјави: „Во овој момент тешко ми е да го изговорам зборот напад, иако сѐ укажува на такво нешто“. Неофицијалните полициските информации потврдуваат дека камионот „намерно“ влетал во толпата. 

Синоќа еден товарен камион влета во божиќен пазар во берлинската населба Шарлотенбург, усмртувајќи најмалку 12 луѓе, 49 повредени се во болници, дел во тешка состојба.

Лицето за кое се претпоставува дека е возач на камионот, уапсено во обид за бегство од местото на настанот, според медиумски информации веројатно доаѓа од Пакистан. Тој на 31 декември 2015 година преку Пасау влегол во Германија, известува радио РББ повикувајќи се на информации од безбедносни извори. Според аегнцијата ДПА, осомничениот користел повеќе идентитети, утрово тој е на распит. Истрагата ја презеде Сојузното јавно обвинителство од Карлсруе, надлежно за државна заштита. Камионот со полски регистерски таблички според полицијата околу 20 часот влетал на просторот на божиќниот пазар, навлегувајќи 50 до 80 метри и уништувајќи повеќе куќички-штандови. На совозачкото седиште на камионот е најден уште еден човек, Полјак, кој бил мртов. Камионот припаѓа на полска шпедитерска фирма, чиј сопственик Ариел Зуравски за полската ТВН24 изјави дека по 16 часот загубил контакт со возачот, инаку негов роднина. „За него ставам рака в оган, дека не е атентатор, „мора нешто да му се случило“, вели  шпедитерот.

Полицијата претпоставува дека камионот бил украден во Полска од пред едно градилиште, иако според некое информации, можно е да бил украден и во Берлин. 

Германската канцеларка Ангела Меркел изјави: „Тагуваме по загинатите се надеваме дека на многуте повредени ќе може да им се помогне.“ Таа е во постојан контакт со надлежните министри и градоначалникот на Берлин. Германскиот претседател Јоахим Гаум изјави дека е шокиран од настанот. „Ова е тешка ноќ за Берлин и за нашата земја, која мене како и многумина други многу не потресе. Сочуствувам со жртвите, со нивните семејства, како и со сите луѓе кои стравуваат за животите на своите блиски и пријатели“.