Расте загриженоста во САД поради Омикрон

Омикрон за кратко време стана доминантна корона-варијанта во САД. Според проценките, околу 73% од случаите на инфицирани со коронавирус минатата недела отпаѓаат на зараза со Омикрон-сојот. На веб-страницата на Центарот за контрола на болести во САД се објавени податоци кои покажуваат огромен скок на заразени со Омикрон. За споредба, во неделата пред тоа со оваа варијанта биле заразени само околу 12,6% од инфицираните.

Во некои од американските сојузни држави, дури над 90% од новоинфицираните се заразиле со Омикрон. Во текот на летото, САД страдаа од Делта-сојот, кој сега е потиснат на втора позиција. Во септември бројот на новоинфицирани привремено опадна, а од октомври повторно се зголемува. Во последните денови тоа зголемување е особено брзо. 

Кампањата на вакцинирање во земјата, која почна добро, во меѓувреме оди бавно. Досега се вакцинирани 61,5% од населението. Од нив, околу 30% добиле и бустер доза.

Американскиот претседател Џо Бајден денеска треба да ѝ се обрати на нацијата во врска со пандемијата на коронавирус. Досега, Белата куќа ја опишува Омикрон-варијантата како причина за загриженост, но не и повод за паника.