Русија најави делумно повлекување од Украина

Исходот од новата рунда преговори меѓу руските и украинските преговарачи во Истанбул ги зголеми надежите за примирје по едномесечната војна во која загинаа илјадници луѓе, а милиони ги напуштија своите домови. 

Лондон и Вашингтон изразија сомнеж во намерите на Русија, додека на теренот продолжија жестоките битки и бомбардирањето на цивилни цели од страна на руската армија.

По преговорите, украинскиот претставник Давид Арахамија оцени дека се исполни доволно услови за директна средба меѓу претседателите Володимир Зеленски и Владимир Путин.

Рускиот заменик-министер за одбрана Александер Фомин рече дека имало напредок во разговорите за „неутралноста и нуклеарниот статус на Украина“. Поради тоа, рече Фомин, донесена е одлука за повеќекратно намалување на воените активности околу градовите Киев и Чернихив.

Американскиот државен секретар Ентони Блинкен коментираше дека се сомнева во сериозноста на Русија.

„Има разлика меѓу тоа што Русија го вели, и тоа што го прави. Фокусирани сме на второто“, рече Блинкен. Слично се изјасни и портпаролот на британскиот премиер Борис Џонсон. „Ќе цениме според делата на Путин и неговиот режим, а не според неговите зборови“. 

Притисокот врз Москва останува 

Лидерите на САД, Германија, Франција, Италија и Велика Британија во телефонски разговор во вторникот се согласија да продолжат да ја притискаат Русија да прифати прекин на огнот и повлекување на трупите од Украина.

Според изјава на портпарол на германската влада, канцеларот Олаф Шолц, претседателот на САД, Џо Бајден, францускиот претседател Емануел Макрон, британскиот премиер Борис Џонсон и италијанскиот премиер Марио Драги исто така се договориле да го продолжат притисокот врз Русија со санкции.

Тие го повикуваат Путин да дозволи хуманитарна помош и отворање на хуманитарни коридори, особено околу градот Мариупол.

Состојбата во Мариупол била тема и на разговорот на Макрон со Путин. Рускиот претседател порачал дека за надминување на проблемот „неопходно е украинските националисти да го спуштат оружјето“.