Социјалната мрежа на Трамп стартува во февруари

Медиумската групација на поранешниот американски претседател Доналд Трамп има за цел да ја пушти во употреба својата долго ветувана социјална мрежа во февруари, според листата на Aп Стор на Епл.

Апликацијата Трут Соушл (Truth Social) се „очекува“ да биде достапна на 21 февруари, според листата, и ќе има карактеристики слични на алатките за онлајн поврзување што ги има на Фејсбук.

75-годишникот беше исклучен од Твитер - неговата омилена мрежа за комуникација додека беше претседател - како и од Фејсбук и Јутјуб по минатогодишните немири на 6 јануари, кога толпа поддржувачи на Трамп, лути поради неговите повторувани лажни тврдења дека му се украдени изборите во ноември 2020 година, го нападна американскиот Капитол.

Трамп вели дека новата платформа ќе биде алтернатива на интернет компаниите од Силиконската долина, за кои вели дека се против него и другите конзервативни гласови.

Социјалната мрежа во моментов ја користат само поканети гости додека таа се подготвува за јавна употреба, велат од Трамп Медија и Технолошката Групација.

Трут Соушл ќе се приклучи кон веќе преполниот пазар на социјални мрежи популарни меѓу конзервативците и членовите на екстремната десница.

Мрежата Гетр беше пуштена во употреба на почетокот на јули од поранешен советник на Трамп, додека Парлер и Габ веќе се омилени кај поддржувачите на магнатот за недвижности.