„Технички предизвици“ го прекинаа пописот

Пописот денеска (09.09.2021) е прекинат поради надминување на помали технички предизвици, соопшти Државниот завод за статистика (ДЗС). Надлежните уверуваат дека и покрај прекините на пописот, само неколку дена по неговото започнување, оваа обемнастатистичка операција сепак успешно ќе заврши до крајот на месецот. 

„Во тек е надминување на помали технички предизвици кои повремено се појавуваа претходните денови кога на терен имаше висок интензитет на попишување“, соопштија од ДЗС. Според нив, сите внесени податоци се успешно процесирани во системот, а техничките усогласувања се прават со цел процесот да продолжи со несмален интензитет. „Досегашната динамика на попишувањето на терен е гаранција дека заклучно со 30 септември успешно ќе бидат попишани населението, домаќинствата и становите на територијата на целата земја“, велат од Заводот за статистика. 

За четири дена попишани се повеќе од 200 илјади граѓани во Северна Македонија. Пописот започна на 5 септември, а веќе вчера попишувачите беа повлечени од терен.