Уапсени осомничените убијци на новинарот Јан Куцијак

Во рамките на поширока рација, уапсени се вкупно осум лица осомничени за поврзаност со убиството на Јан Куцијак, како директни извршители или помагачи, објавува информативниот портал „Деник Н“, повикувајќи се на полициски извори. Засега не се даваат подетални информации, со цел да не се изврши попречување на тековната полициска акција, стои на официјалната Фејсбук-страница на порталот. 

Повеќе: 

„Словачка оди по патот на Орбан“

Краците на земјоделската мафија во Словачка

Јан Куцијак и Мартина Куснирова беа застрелани на 21 февруари оваа година пред  нивната куќа во западнословачкото место Велка Маца. Куцијак во периодот непосредно пред егзекуцијата вршел новинарски истражувања за поврзаноста меѓу политиката и економскиот криминал. Неговата недовршена репортажа за можните врски на италијански мафијашки кланови со словачки владини соработници беше објавена по неговата смрт. Случајот предизвика во земјата масовни демонстрации против корупцијата и злоупотребата на пари од поддржувачките фондови на ЕУ. Последица на протестите во Словачка беше оставка на владата и на првиот човек на полицијата.

Повеќе: Словачка: Манекенка, мафија и висока политика

Кратко пред апсењето на осомничените убијци на Јан Куцијак, во посета на Словачка беше делегација на ЕУ, составена од петмина европарламентарци кои сакаа да се информираат за текот на истрагата, како и за напредокот на земјата во борбата против корупцијата и заштитата на новинарите.