Џулијани: Трамп дал пари за молк на порно-актерката

Поранешниот градоначалник на Њујорк, Руди Џулијани, вели дека Доналд Трамп му ги вратил парите на својот адвокат Мајкл Коен, кој ѝ платил пари на порно-актерката Сторми Даниелс за да молчи околу својата наводна афера со Трамп. Трансакцијата од 130.000 долари била направена преку адвокатската канцеларија и претседателот подоцна ги вратил парите, рече Џулијани во интервју за американската телевизија Фокс Њус.

Трамп ги враќал парите во временски период од неколку месеци. Претседателот не бил запознат со деталите, вели Џулијани. „Но, тој знаел за генералниот договор Мајкл да се грижи за работите, како што и јас се грижам за вакви рбаоти на моите клиенти. Не ги оптоварувам со сѐ што ќе дојде. Тоа се многу зафатени луѓе.“

Џулијани, кој е долгогодишен пријател на американскиот претседател и од април годинава негов правен советник, тврди дека Трамп со исплатата не ги прекршил законите за финансирање на изборната кампања, затоа што парите не биле од буџетот за кампањата.

Сторми Даниелс, чие вистинско име е Стефани Клифорд, според сопствените наводи, во 2006 година имала сексуален однос со Доналд Трамп. Американскиот претседател тоа го негира. Трамповиот адвокат Коен призна дека непосредно пред претседателските избори во ноември 2016 година од свој џеб платил 130.000 долари. Според Клифорд, станува збор за пари кои ѝ биле дадени за да молчи.

Коен тврдеше дека организацијата на Трамп и неговиот изборен штаб не учествувале во исплатата ниту директно ниту индиректно и дека не го обесштетиле. Претседателот Трамп на почетокот на април пред новинарите тврдеше дека не знаел ништо за исплатата. Клифорд поради тоа против Трамп поднесе тужба за клевета.