Смртоносен земјотрес во Авганистан и во Пакистан
22 март 2023
Најмалку 13 луѓе го загубија животот, а над 90 се повредени во земјотрес со интензитет од 6,5 степени според Рихтеровата скала во Авганистан и во Пакистан, соопштија владините претставници.
Најмалку 9 лица загинале, 44 се повредени на северозападот на Пакистан, соопшти претставник на пакистанската влада, додека во Авганистан има најмалку 4 жртви, а 50 луѓе се повредени. Во двете земји се оштетени бројни куќи и згради.
Според американскиот геолошки институт УСГС, епицентарот на земјотресот со интензитет од 6,5 степени според Рихтеровата скала бил во близина на градот Џурм во североисточниот дел на Авганистан на длабочина од 187 километри.
Според УСГС, земјотресот траел најмалку 30 секунди и бил почувствуван дури до Њу Делхи, главниот град на Индија, кој се наоѓа на околу 2000 километри од епицентарот.
И германскиот геолошки истражувачки центар во Потсдам измери интензитет од 6,5 степени и го лоцираше епицентарот на земјотресот на длабочина од околу 180 километри. Според центарот, вообичаено при земјотрес со ваква јачина и длабочина на епицентарот нема непосредна штета. За споредба: Според експертите од Потсдам, епицентарот на катастрофалниот земјотрес во турско-сирискиот пограничен регион пред повеќе од шест недели беше на длабочина од десет километри.
Сеизмички активно подрачје
Земјотресот се почувствувал во опсег од над 1.000 километри, на подрачје каде што живеат 285 милиони луѓе во Пакистан, Индија, Узбекистан, Таџикистан, Казахстан, Киргистан, Авганистан и Туркменистан, соопшти Европско-медитеранскиот сеизмолошки центар.
Епицентарот бил во планините Хиндукуш, во ретко населената североисточна авганистанска провинција Бадакшан, на длабочина од 187 километри, соопшти американската геолошка служба УСГС.
Во земјотрес со јачина од 6,1 степени според Рихтеровата скала во источен Авганистан во минатата година загинаа повеќе од 1.000 луѓе. Најмалку 73.000 луѓе настрадаа во земјотрес со јачина од 7,6 степени во северен Пакистан во 2005 година.