Крави пред Бундестагот

Невообичаена глетка во Берлин - стадо крави пред зградата на Бундестагот како дел од протестот на еколошката организација Гринпис и Работната група за рурално земјоделство (АбЛ). Организациите за заштита на животната средина бараат повеќе пасење на кравите молзници и поправедни цени на млекото.

Според Гринпис, во 2010 година 42% од говедата имале пристап до пасишта, а десет години подоцна пристап имаат само 31%. „Крава на ливада ќе стане загрозен вид во Германија“, изјави Ласе ван Акен, експерт на Гринпис за земјоделство.

Пасењето, како што се нагласува, е особено прикладно за говедата и се одразува позитивно врз нивното здравје. Освен тоа, пасиштата чуваат значително повеќе јаглерод во почвата отколку обработливите растенија и помагаат за зачувување на биодиверзитетот.