Германија ќе воведе „зелена карта“

Здруженијата на индустријата долго време се жалат на недостиг од квалификувани работници, а Министерството за труд предупредува дека тоа може да го забави економскиот раст. Според Сојузот на германските здруженија на работодавачи во металопреработувачката и електро-индустрија, две од пет компании велат дека нивното производство е попречено поради  недостиг на кадар.  Централното здружение на германски занаетчии (ЗДХ) проценува дека на Германија ѝ недостасуваат околу 250.000 занаетчии.

Критериуми за работа

Сега т.н. „Карта на можности” која министерот за труд, Хубертус Хајл, ја претстави неделава, треба да им овозможи на  странците и без понуда за работа да допатуваат во земјата.  За тоа мора да исполнат барем три од следните четири критериуми:

1) универзитетска диплома или професионална квалификација

2) минимум три години работно искуство

3) јазични познавања или поранешен престој во Германија

4) возраст под 35 години

Ќе има и дополнителни ограничувања и услови, нагласи политичарот од СПД. Бројот на карти ќе биде ограничен според потребата, а ќе го одредува сојузната влада, рече Хајл.

„Се работи за квалификувано доселување, без бирократска постапка. Затоа е важно оние кои ќе добијат карта да може да си обезбедат егзистенција кога ќе дојдат", рече Хајл во средата за ВДР. 

Сѐ помалку млади во Германија

И Совмија Тијагарајан смета дека има простор за подобрувања на германскиот пазар на труд. Таа во 2016 се преселила од Индија во Хамбург за да докторира на воздухопловна техника. Сега веќе е директор на сопствената германска фирма Фовијатек, што развива софтвер за оптимизација на транспорт- и услуги во здравството.

„Мислам дека системот со бодување е добра можност за луѓе од странство да работат тука", вели таа за ДВ. „Пред сѐ зашто има сѐ помалку млади луѓе во Германија." Во моментов нејзината компанија преферира при вработувањето кандидати германски и државјани на ЕУ, поради бирократските пречки кои постојат за странци.

Користа од четирите критериуми таа различно ја оценува: квалификации и познавање на јазици се многу важни. „За ограничување на возраста под 35 години не сум сигурна колку е паметно. Не мора да си млад, треба да си способен", вели бизнисменката. Во однос на трите години работно искуство, Тијагарајан е исто така скептична бидејќи во некои случаи универзитетска диплома е гарант дека кандидатот има стекнато доволно стручност: „За некои профили не ви треба искуство, а за некои навистина е потребно."

Бирократски пречки за странски работници

Уште покритичен е Холгер Бонин во однос на плановите на министерот за труд Хајл. За директорот за истражувања при Институтот за трудова економија во Бон, картата за шанси поставува „непотребно високи пречки и го прави системот компликуван”. Бонин страхува дека  ќе има уште повеќе бирократија.  „Зошто не ги поедноставиме работите? На луѓето им се дава виза да бараат работа и ако не најдат ништо во одреден период мора да си заминат." Ако тие критериуми се важни за работодавците, „може да си одлучат при вработувањето. Не мора карта на можности да претходи на процесот."

Бонин аргументира дека некои критериуми наведени од Хајл за германски работодавачи можеби и не се толку важни, како на пример, во меѓународна компанија во која главно се комуницира на англиски е релативно небитно дали кандидатот зборува германски или живеел во Германија.

Културолошки и структурни проблеми

Германија во споредба со други западни земји кои се обидуваат  да привлечат работна сила,  има некои културолошки недостатоци: германски помалку се зборува отколку англиски. „Стручни сили речиси секогаü бараат земји каде се зборува англиски”, вели Тијагарајан. Дополнителен проблем е што германски работодавци традиционално придаваат поголемо значење на сертификати и квалификации, а странските во Германија често не ги признаваат или  нострификацијата трае со месеци.  „Таквите проблеми не се решаваат со воведување на карта на можности", вели Бонин.

Покрај тоа, има и системски потешкотии. Германскиот федерален систем со регионални ингеренции доведува до тоа во некои покраини локалните власти да признаваат различни квалификации отколку на друго место. Германија и натаму е зависна од бирократијата во која странската работна сила често пати мора да приложи нотарски заверени преводи од нивните свидетелства. И тоа е проблем што министерот за труд, Хајл, сака да го адресира.

„Мислам дека е многу, многу битно покрај модерен закон за доселување, да го заслабнеме и административното чудовиште при признавањето на квалификациите", рече тој за ВДР. За таа цел си посакува Централна институција која брзо ќе признава квалификации и канцеларии во Германија кои ќе ги растеретат конзулатите во странство. Предлог на новиот закон Хајл ќе претстави на есен.