Германија: Генерален штрајк во сообраќајот

Во голем предупредувачки штрајк, железничкиот и транспортниот синдикат ЕВГ и синдикатот на јавниот сектор Верди денеска парализираа голем дел од сообраќајот низ Германија - вклучувајќи го железничкиот и воздушниот, како и дел од водениот и копнениот транспорт. 

Генералниот  штрајк започнa на полноќ и ќе трае 24 часа,  соопштија двата синдикати. Верди повика 120.000 вработени на штрајк, а ЕВГ 230.000 вработени во автобуските компании и железницата.Со оглед на расположението на вработените во транспортните компании, се очекува високо ниво на учество, изјави шефот на Верди, Франк Вернеке, најавувајќи го штрајкот во четвртокот, додавајќи дека  „ефектот ќе биде огромен“.

Железница 

Штрајкот ги зафаќа сите видови железнички сообраќај низ државата. Дојче бан (ДБ) воопшто нема да работи. Претседателот на ЕВГ, Мартин Буркерт, препорача патниците да пристигнат на нивната дестинација што е можно порано во недела. „Бидејќи дефинитивно може да има смени од недела навечер до понеделник“, рече тој. 

Автопати, тунели , воден сообраќај 

Ќе штрајкува и Претпријатието за автопатишта, како и Управата за вода и транспорт. Тоа значи дека со штрајкот ќе бидат опфатени и тунелите на патиштата. „Размислуваме за конкретни тунели“, рече заменичката на Верди, Кристин Бел. Се уште не е јасно кои тунели ќе бидат затворени. 

Аеродроми и јавен превоз 

Верди исто така повикува на затворање на аеродромите и на локалниот јавен превоз во покраините Хесен, Северна Рајна-Вестфалија, Баден-Виртемберг, Саксонија, Долна Саксонија, Рајна-Пфалц и Баварија.

Тоа значи дека се погодени сите комерцијални аеродроми, освен во Берлин.

Нема да има патнички сообраќај на најголемиот германски аеродром во Франкфурт, како и во Минхен. Раководството на Франкфуртскиот аеродром Фрапорт во четвртокот соопшти дека итно се бара патниците да не доаѓаат на аеродромот во понеделник. Нема да има ниту транзитен сообраќај. 

Што велат работодавците? 

Според аеродромското здружение АДВ, штрајкот ќе погоди стотици илјади патници. „Околу 380.000 деловни и приватни патници нема да можат да летаат“, соопштија од здружението.

Се зборува за „ескалација на штрајкот според францускиот модел“. Целата земја ќе биде отсечена од меѓународниот воздушен сообраќај. 

„Синдикатите во Германија се збогуваат со традицијата на постигнување решенија на преговарачка маса“, критикуваше извршниот директор на АДВ, Ралф Бајсел. Најавените дејствија излегуваат надвор од секоја замислива и оправдана мерка и немаат врска со предупредувачки штрајк. „Тоа е обид да се воведат француски услови во Германија со генерален штрајк.“ 

Дојче бан (ДБ) го критикуваше штрајкот како „неразумен и непотребен". ЕВГ мора да се соочи со својата одговорност и „веднаш да се врати на преговарачката маса", побара Мартин Сејлер, директор за човечки ресурси во ДБ. Железниците „поднесоа одговорна понуда“ и секогаш се подготвени да разговараат. Следниот редовен датум за преговори на крајот на април е предоцна.

„Претпоставуваме дека земјата ќе биде парализирана во понеделник и речиси никаков железнички сообраќај нема да биде возможен“, рече Сејлер.

Купените билети за 27 и 28 март - може да се откажат бесплатно или флексибилно да се искористат до 4 април.

„Секако дека сме подготвени да ги обесштетиме патниците во такви ситуации“, рече Сејлер и сепак советуваше: „Секој што може да го презакаже патувањето, ве молиме да го стори тоа“.

Сојузниот министер за транспорт Волкер Визинг предупреди во изјавата за печатот: „Можам само да апелирам до сите партнери да бидат свесни за нивните одговорности за да има што е можно помало влијание врз населението“. Железницата дава огромен придонес за мобилноста и снабдувањето со општеството. 

Продолжување на преговорите в понеделник 

Со овие акции синдикатот Верди го зголемува притисокот врз третата рунда преговори со сојузната влада и локалните власти, која започнува в понеделник.

Заедно со Здружението на државни службеници ДББ, Синдикатот на јавниот сектор бара 10,5 отсто и најмалку 500 евра месечно повеќе - за 2,5 милиони вработени.

На крајот на февруари, во втората рунда преговори, работодавачите (државата) понудија зголемување на платите за пет отсто во два чекора и еднократна исплата во вкупен износ од 2.500 евра.

Синдикатите се „соочени со целосно несоодветна понуда и затоа е важно повторно да ставиме до знаење дека нашите барања имаат широка поддршка меѓу вработените пред почетокот на третиот круг на колективно договарање“, рече Вернеке.  

Кон крајот на февруари, синдикатот за железници ЕВГ започна преговори со ДБ и околу 50 други железнички компании - и бара најмалку 650 евра повисока плата, со цел да се зголеми за 12 отсто со рок на траење од една година од колективниот договор. 

Минатата недела синдикатот ја отфрли првата понуда на ДБ - зголемување на платите во два чекора за вкупно 5 отсто и неколку еднократни исплати во вкупна вредност од 2.500 евра. 

Синдикатите се будат по 30 години 

Последен пат сообраќајот низ Германија беше парализиран пролетта 1992 година, пред повеќе од 30 години. Штрајкот потоа траеше неколку недели, а неколку стотици илјади вработени привремено престанаа да работат. Сепак, тоа беше „вистински“ штрајк кој трае до постигнување договор, а не предупредувачки штрајк - како што во Германија се нарекува прекин на работата на одредено време.

Френк Вернеке се чини дека го инспирираше својот синдикат со голем број акции во изминатите неколку недели - штрајкови и улични протести се одржаа меѓу вработените во градинките, клиниките и многу други области.

Дополнително, оваа пролет е забележлива зголемената соработка на синдикатите и другите делови од општеството . Така, активистите „Петоци за иднината“ ги поддржаа синдикалните штрајкови на 3. март, а преку нивните канали ги најавија и активностите на 27-ми март.