Израел бара од Германија муниција за воени бродови
12 октомври 2023
Израел побара од Германија муниција за воени бродови поради терористичките напади на Хамас, соопшти германскиот министер за одбрана Борис Писториус денеска изутрина (12.10) на маргините на состанокот на НАТО во Брисел. Според информациите на германската агенција ДПА, побарани се и залихи со крв и заштитни елеци. Писториус рече дека сега за барањата ќе се разговара со Израелците. „Ние стоиме на страната на Израелците“, увери министерот за одбрана.
Сојузното Министерство за одбрана претходно потврди дека Германија ќе го поддржи Израел со најмногу две борбени беспилотни летала Херон ТП изнајмени од Бундесверот. Бундесверот моментално изнајмува пет дронови од овој тип.
Вчера попладне, Писториус рече дека нема индиции оти Израел сака да побара од партнерите, како што е Германија,оружје и опрема за војна против Хамас, но ако до тоа дојде, Германија ќе се консултира со партнерите.