Кина сака „стратешко партнерство“ со Асад

Кина и Сирија сакаат да изградат „стратешко партнерство“. Продлабочените односи меѓу двете земји ќе бидат важна пресвртница во нивната историја, изјавил кинескиот претседател Ши Џинпинг, а пренесува државната телевизија ЦЦТВ, по повод посетата на неговиот сириски колега Башар ал-Асад.

Прво патување по речиси 20 години

Асад отпатува во Кина за првпат по речиси 20 години и вчера (21.09) пристигна во градот Хангжу за да присуствува на церемонијата на отворањето на Азиските игри. Тој со години беше во голема мера меѓународно изолиран поради неговото брутално задушување на бунтовниците во Сирија.

Кина го поддржуваше Асад во Советот за безбедност

Сепак, Кина, како и најважните сојузници на Асад, Русија и Иран, одржуваше односи со Сирија и постојано го поддржуваше сирискиот владетел со воздржување при расправите за резолуциите на Советот за безбедност на ОН кои ја критикуваат Сирија.

Во мај, земјите од Арапската лига повторно му посакаа добредојде на Асад во својот круг, а Кина и Сирија пред извесно време ја проширија својата економска и политичка соработка.Сирија сака да стане дел од кинескиот мегапроект „Новиот пат на свилата“, во кој владата во Пекинг сака да инвестира неколку стотици милијарди евра. По повод десетгодишнината од проектот, во октомври ќе се одржи форум за „Новиот пат на свилата“, на кој во Пекинг се очекува и рускиот претседател Владимир Путин.