Компании на Трамп погласени за виновни за даночна измама
7 декември 2022
За првпат, компанија на поранешен претседател е осудена за криминални дела, резимираше надлежниот државен обвинител на Менхетен, Алвин Брег. Поротата на Менхетан ги прогласи две компании на Трамп организацијата за виновни по повеќекратни обвинувања за кривична даночна измама и фалсификување на деловни записи.
Судот фалсификувањето го поврза со 15-годишна комплексна шема на измама на даночните власти така што компаниите не пријавиле и не платиле данок на компензацијата за највисоките раководители. „Трамп корп“ и „Трамп пејрол корп“ се прогласени за виновни по сите обвиненија.
Доналд Трамп и неговото семејство не се обвинети во овој случај, но обвинителите повеќепати за време на судењето го споменуваа поранешниот претседател поради неговата поврзаност со бенефициите кои се даваат на одредени раководители, вклучувајќи ги становите кои ги финансираат компаниите, изнајмување на автомобили и лични трошоци.
Пресудата доаѓа во момент кога Трамп се соочува со надзор од страна на федералните обвинители, но и обвинителите во неколку сојузни држави поради ракување со доверливи документи, напорите да се поништат резултатите од изборите во 2020 година и точноста на деловните записи и финансиските извештаи на неговите организации.
Тој, исто така, се соочува со граѓанска тужба од 250 милиони долари од страна на државниот обвинител на Њујорк во која се наведува дека тој и неговите возрасни деца се вмешани во децениска измама. Државниот обвинител бара трајно да им се забрани да извршуваат функции на службеници или директори на компании во државата Њујорк, меѓу останатите казни.
„Ова е случај на алчност и измама“, рече окружниот обвинител на Менхетен, Алвин Брег.
„Трамп корп“ и „Трамп пејрол корп“ се извлекле со шема која им обезбедувала на високите раководители раскошни поволности и надокнади, додека намерно ги прикривале придобивките од даночните власти за да избегнат плаќање на даноци. Со денешната пресуда овие компании на Трамп се одговорни за нивната долгогодишна криминална шема, рече Брег.