Нови, мистериозни експлозии на Крим

По вторпат за една недела на полуостровот Крим, кој беше анексиран од Русија, се случуваат мистериозни експлозии. Утрово експлодираше магацин за муниција и беа повредени најмалку две лица.
Околу 2.000 луѓе се евакуирани од регионот, соопшти локалниот гувернер. Видео снимки од пожарот и експлозиите објавени на социјалните мрежи покажуваат густ чад и оган на местото додека во позадина одекнуваат повеќекратни експлозии.
„Окупираниот Крим од Русите стана место каде експлодираат магацини и постои голем ризик од смрт за окупатори и крадци“, објави на Твитер советникот на украинскиот претседател Михајло Подолјак, но неговата земја досега не презеде одговорност за нападот. 

Руското министерство за одбрана соопшти дека избувнал оган „на место каде што привремено се чувала муниција за една воена единица“. „Поради пожарот, експлодираше муницијата во магацинот“, велат во Москва, но не ги соопштуваат причините за пожарот. 

Случајни експлозии 

Регионот каде што одекнаа експлозиите е на северот на полуостровот, на околу 50 километри од регионот Херсон во јужна Украина кој е окупиран од Русија. Украинската армија последните недели започна серија напади во регионот, напаѓајќи ги логистичките рути и мунициски магацини на Русија. 

Рускиот гувернер на Крим, Сергеј Аксионов соопшти дека освен масовната евакуација на локалните жители во регионот, во прекин е и железничкиот сообраќај поради оштетување на пругата.

Минатата недела, серија експлозии во воздухопловната база Саки на Крим уништија најмалку девет руски воени авиони. Руската армија тврдеше дека се работело за случајна експлозија на муниција, но сателитските снимки покажуваат големи кратери на теренот.