„Зимска идила“ среде лето во Ројтлинген

На прв поглед изгледаше како дебела снежна покривка. Но, белата покривка во германскиот град Ројтлинген, во кој како и насекаде во северната хемисфера е лето, беше последица на обилниот град. Купишта мраз можеа да се видат во центарот на градот и денеска, односно еден ден откако, низ градот протатне летна бура со поројни врнежи на дожд и град. 

Според информациите од управата од германскиот град Ројтлинген и локалната противпожарна служба, во петокот, на 4 август, низ центарот на Ројтлинген поминало „локално невреме со обилен град и пороен  дожд“. 
Улиците во Ројтлинген биле покриени со дебел слој бел град висок 30 сантиметри. 

„Лисјата и 30-сантиметарскиот слој град ги блокираа одводните шахти и водата навлезе во подземните гаражи, подруми и станбени згради“, објави градот преку својот профил на Твитер.

Техничките служби излегле со неколку машини за снег за да ги расчистат улиците. Според информациите од градот, во околу 100 интервенции биле вклучени околу 250 професионални пожарникари и сите доброволни противпожарни единици.

Нивото на реката Ехаз се зголеми и привремено се излеа од коритата во населбата Бецинген, но не предизвика големи штети, додаваат тие.

Градот ги повика своите жители да ги избегнуваат подрумите и подземните гаражи и да се воздржат од непотребно возење автомобил.