Османи: Ќе го преиспитаме нашето учество во Отворен Балкан

Учеството на Македонија во проектот Отворен Балкан е доведен во прашање поради случувањата на северот на Косово на крајот на септември. Министерот за надворешни работи Бујар Османи во средата на ТВ Телма најави преиспитување на учеството на Скопје во иницијативата во која се уште и Белград и Тирана, доколку се докаже дека српската држава имала учество во инцидентите во Косово на 24 септември.

„Таа беше добронамерна идеја, меѓутоа мислам дека после случувањата во Косово на 24 септември, навистина треба Србија да направи напори и да докаже дека не се вмешани во тој настан. Бидејќи доколку има било какво државно вмешување навистина го прави невозможно нашето учество и на другите земји во регонот, бидејќи идејата на Отворен Балкан беше помирување. Ова што се случи во северно Косово со нападот, се надевам дека ќе се докаже дека нема државно вклучување, но ако се докаже навистина мислам дека треба да го преиспитаме нашето учество“, рече Османи. 

Крвава престрелка  

На 24 септември се случи еден од најтешките инциденти по осамостојувањето на Косово во 2008 година. Еден косовски полицаец беше убиен во престрелка со вооружена група. 

По интервенцијата на косовската полиција, групата од околу 30-тина тешко наоружани напаѓачи се забарикадира во околниот манастир Бањска. Во престрелките со косовските безбедносни служби тројца напаѓачи беа убиени, другите избегаа. Полицајците потоа запленија разни видови оружје, еден џип и едно блиндирано возило.

Парамилитарната групација ја предводел Милан Радоичиќ, жител на северот на Косово, кој во меѓувреме беше уапсен во Белград и пуштен од притвор, но одземен му е пасошот.

Радоичиќ призна одговорност за нападот на српските милитанти врз косовските полицајци.

Косовската претседателка Вјоса Османи ги обвини Србија и нејзиниот претседател Александар Вучиќ дека директно биле одговорни за нападот.

Официјален Белград демантираше дека стои зад терористичката операција.