Над 800.000 барања за азил во ЕУ, Швајцарија и Норвешка

Од почетокот на годинава досега се поднесени 801.459 барања за азил во земјите од Европската унија, Норвешка и Швајцарија. Споредено со истиот период минатата година, ова е највисока вредност од 2016 година, пишува дневниот весник „Велт“. Весникот ги цитира тековните податоци на Агенцијата за азил на ЕУ (ЕУAA) од доверлив извештај на Европската комисија.

Најголем пораст забележа Летонија со плус од 168% и Естонија со 119%. Порастот се должи на наглото зголемување на нерегуларната миграција од Белорусија како резултат на војната во Украина.

Германија се најде на трето место со пораст на бројот на барања за азил од 74 отсто во однос на истиот период лани. Во Германија, според EУAA, речиси секое трето барање за азил го поднел Сириец (27 проценти), потоа мигранти од Авганистан (17 проценти) и Турција (16 проценти).

Во Франција, пак, според „Велт“, процентуалниот пораст од 37 отсто е двојно помал отколку во Германија. Во Италија бројките се зголемени за 63 отсто во однос на истиот период минатата година, цитира весникот од извештајот на ЕУ.

Најмногу паднале бројките во Данска (минус 56 отсто), Малта (минус 54 отсто), Кипар (минус 52 отсто) и Австрија (минус 41 отсто). Земјата со најмалку луѓе кои годинава побарале заштита досега е Унгарија, која досега има регистрирано само 26 барања за азил.