Путин нареди маневри со нуклеарно оружје

Наредбата на рускиот претседателВладимир Путин за маневри со нуклеарно оружје е одговор на изјавите на францускиот претседател Емануел Макрон, кој не ја отфрли можноста за испраќање војници, потенцираше во Москва портпаролот на руската влада, Дмитри Песков. Слични изјави дале и британски политичари и членови на Претставничкиот дом на САД. Руските тајни служби, како што се вели од Москва, ќе ги истражат и извештаите дека француски странски легионери се префрлаат во Украина.

Министерството за одбрана во Москва соопшти дека на маневрите ќе се вежба употреба на тактичко нуклеарно оружје. Во маневрите ќе учествуваат ракетни формации од Јужниот воен округ и поморски сили. Целта, како што се вели, е да се обезбеди територијален интегритет на Русија „како одговор на провокативните изјави и заканите на некои западни претставници против Руската Федерација“. Русија постојано ги обвинува САД и нивните сојузници дека со воената помош за Украина го туркаат светот на работ на конфронтација меѓу нуклеарните сили.