Северна Кореја повторно истрела балистички ракети

Генералштабот на Јужна Кореја соопшти дека двете балистички ракети со краток дострел биле истрелани во близина на севернокорејската престолнина Пјонгјанг. Тие летале околу 550 километри пред да завршат во морето источно од Корејскиот Полуостров. Ваквите информации се во согласност со оценката на јапонската армија дека проектилите паднале во морето надвор од ексклузивната економска зона на Јапонија.

Американска нуклеарна подморница во Јужна Кореја

Лансирањето на ракетите се случило веднаш по пристигнувањето на американската нуклеарна подморница УСС Кентаки во јужнокорејското пристаниште Бусан. Со оглед на зголемените тензии со Северна Кореја, САД и нивниот сојузник Јужна Кореја во април се договорија да ја зајакнат својата воена соработка. Ова го вклучува и преместувањето на подморницата на американската морнарица опремена со нуклеарно оружје во Јужна Кореја, објавија двете страни. Последен пат американска нуклеарна подморница влезе во пристаниште во Јужна Кореја во 1981 година.

Се очекуваше дека овој потег ќе предизвика реакција од Северна Кореја. Пјонгјанг протестираше против распоредувањето на американско нуклеарно оружје околу Корејскиот полуостров.

Јужнокорејскиот генералштаб го осуди новото лансирање на ракетите како „значајна провокација“ и јасно кршење на резолуциите на Советот за безбедност на ОН. Изолираната Северна Кореја со години ја проширува својата програма за вооружување и затоа е предмет на меѓународни санкции. Забрането е и тестирање на балистички ракети, кои, во зависност од дизајнот, може да бидат опремени и со нуклеарна боева глава.