Украина: Смртоносен руски ракетен напад врз станбена населба
8 август 2023
Најмалку осум лица се убиени во руски ракетни напади врз градот Покровск во источниот украински регион Доњецк, соопштија официјални украински претстабници. Меѓу жртвите се пет цивили, двајца вработени во спасувачките служби и еден војник, соопшти началникот на воената управа на регионот Доњецк, Павло Кириленко, на онлајн сервисот Телеграм. 14 лица се повредени во нападите.
Две ракети погодија станбена населба во Покровск, потврди и украинскиот министер за внатрешни работи Ихор Клименко на Телеграм. Меѓу повредените има и неколку полицајци и спасувачи. Тие биле погодени од втората ракета додека им помагале на жртвите од првиот напад.
„Напад врз обична станбена зграда“
И претседателот на Украина, Володимир Зеленски, исто така извести за рускиот напад врз „обична станбена зграда“. На онлајн сервисот „Х“, сè уште познат првенствено како Твитер, тој напиша: „Мораме да го запреме рускиот терор“. Во својата видеопорака тој исто така рече дека Русите користеле ракети Искандер во нападот на Покровск.
Според Павло Кириленко, освен станбени згради, оштетен е и хотел во кој биле сместени странски новинари, како и ресторани, продавници и административни згради. Покровск се наоѓа на околу 70 километри северозападно од градот Доњецк, кој е под контрола на Русија и е на околу 30 километри од линијата на фронтот. Пред војната, во градот живееле околу 60.000 луѓе.
Загинати и повредни и во регионот Харков
Ракетниот напад врз Покровск е еден од досега најкрвавите руски воздушни напади врз места во источна Украина од почетокот на војната.
Руско гранатирање беше пријавено и во понеделникот вечерта од областа Харков што граничи со Доњецк. И при овие напади има загинати и повредени, информираат локалните власти. Според нив, двајца цивили загинале, а седум други се повредени од руските гранати во селото Кругљакивка.