Шолц против итен прекин на огнот во Газа
13 ноември 2023
Германскиот канцелар Олаф Шолц изјави дека е против итен прекин на огнот во војната во Појасот Газа, додека за тоа има сѐ повеќе повици во светот поради израелското бомбардирање на таа палестинска територија со два милиони цивили.
„Слободно признавам дека не мислам дека се праведни повиците за итен прекин на огнот или долга пауза - што би било речиси исто, бидејќи на крајот би значело дека Израел му остава на Хамас можност да се опорави и да набави нови ракети“, рече Шолц.
За време на дебатата организирана од регионалниот германски дневен весник Хајлбронер Штиме, сепак, германскиот канцелар се заложи за „хуманитарни паузи“ во војната која започна на 7 октомври.
Пет недели од почетокот на војната, сè повеќе има повици за прекин на огнот во Појасот Газа, кој Израел го напаѓа од земја, воздух и од море.
Со противењето на прекинот на огнот, германскиот канцелар оди против многу арапски земји и претседателот на Турција, со кој треба да се сретне во Берлин наредната недела.
Реџеп Таип Ердоган во неделата оцени дека „за нас е од витално значење да постигнеме прекин на огнот“ и го повика „Западот“ да изврши притисок врз Израел во таа насока.
Олаф Шолц, исто така, се огради од францускиот претседател Емануел Макрон, кој во петокот го повика Израел да го прекине бомбардирањето за да ги поштеди цивилите во Газа и кој рече дека има намера да „работи“ за прекин на огнот за „да ги заштити сите цивили“ кои „немаат никаква врска со со терористите“ од палестинското движење Хамас.
Министерството за здравство на Хамас соопшти дека најмалку 11.078 луѓе, главно цивили, од кои 4.506 деца, се убиени во израелското бомбардирање на Појасот Газа од почетокот на војната предизвикана со крвавиот напад на исламистичкото движење на југот на Израел, во кој загинаа 1.200 луѓе, повеќето, исто така, цивили.