Србија: Безредија на протестите во Белград
25 декември 2023
На седмиот по ред протест, приврзаниците на српската опозиција вчера (24.12) демонстрираа пред Собранието на Белград. Тие го нападнаа Градското Собрание и се судрија со полицијата. Демонстрантите фрлаа со камења, шипки и јајца врз Собранието, кршеа прозорци и се обидоа да влезат во зградата, јави агенцијата АФП. Полицијата ги потисна демонстрантите назад и притоа употреби солзавец. Протестите беа растурени околу 22 часот.
Српскиот претседател Александар Вучиќ по протестите изјави дека „тешко се повредени“ двајца полицајци, а неколкумина други имаат полесни повреди. Уапсени се над 35 демонстранти. Според Вучиќ, во Белград вчеравечер бил направен обид за „насилно заземање на државните институции“. Тој тврди дека постојат докази оти „сѐ било подготвувано“.
На парламентарните избори во Србија пред една недела Српската напредна партија (СНС) на Вучиќ постигна јасна победа. На истиот ден се одржуваа и локални избори, а резултатот во Белград беше тесен. Меѓународната набљудувачка мисија утврди низа „неправилности“, меѓу кои и случаи на насилство, купување гласови и полнење избирачки кутии со фалсификувани гласови.
Врз основа на ваквиот извештај на набљудувачите, Министерството за надворешни работи во Берлин соопшти дека прекршувањата се „неприфатливи за една земја со ЕУ-кандидатски статус“.
По изборите избија протести пред зградата на српската изборна комисја. Повеќе опозициски политичари стапија во штрајк со глад барајќи анулирање на резултатите од изборите.