Шведска: Експлозиите на Северен тек се резултат на саботажа

Дупките на двете траси на гасоводот Северен тек се резултат на саботажа, заклучи шведското обвинителство по спроведената истрага за експлозиите на гасоводот во Балтичкото Море. Анализите покажале траги од експлозив на повеќе откриени „страни тела“, соопшти обвинителот Матс Лјунгквист. Со детални анализи ќе се продолжи и натаму, се вели од шведското обвинителство.

На двете траси на гасоводот Северен тек на крајот на септември беа откриени дупки на четири места во данските и шведските води. Преку гасоводот Северен тек 1 до запирањето со транспорт на гас пред неколку месеци, се пренесуваше гас од Русија кон Германија и други европски земји. Гасоводот Северен тек 2, пак, никогаш не почна со работа поради руската инвазија на Украина.

Русија денеска соопшти дека веста од шведското обвинителство за саботажа на гасоводот е потврда за наводите на Кремљ. „Наводите за акт на саботажа или тероризам само уште еднаш ги потврдува информациите кои ги имаше и ги има руската страна“, оцени портпаролот на Кремљ, Дмитри Песков, а пренесува руската агенција Интерфакс. Според Песков, сега е важно да се открие кој стои зад експлозиите.