Три деца меѓу жртвите во руски ракетен напад во Краматорск
28 јуни 2023
Меѓу жртвите кои се извлечени од урнатините на погодениот локал се наоѓаат и три деца, соопштија краматорските власти денеска утрото. Две од децата биле родени во 2008 година, а едното во 2011 година. Во нападот се ранети најмалку 56 луѓе.
Првичните информации, соопштени синоќа по ударот на ракетата, беа дека загинале 3 лица, а повеќе од 40 се повредени.
Спасувачките екипи морале претходно да ги расчистуваат урнатините во потрага по преживеани во ресторанот во центарот на градот.
Украинскиот претседател Володимир Зеленски овој нов напад врз градот Краматорск во својата вечерна видео порака во вторникот најостро го осуди како уште едно воено злосторство.
„Ваквиот терор за нас и за целиот свет е уште еден доказ декаРусија за своите дела заслужува само едно: пораз и изведување пред судот на правдата.“
Претходно и украинскиот министер за внатрешни работи Ихор Клименко соопшти дека руската армија во два наврати во вторникот вечерта го ракетирала Краматорск и меѓу другото е погоден и еден ресторан.
Во агресорската војна која Русија веќе подолго од 16 месеци ја води против Украина, без оглед на официјалните тврдења од Москва, постојано се вршат напади со ракети и дронови врз украински станбени области, во кои чести жртви и повредени се цивили.