Папата не одеше во поворката на Патот на крстот

Во текстовите на папата Франциско, читани за време на традиционалната процесија на Патот на крстот околу Колосеумот во Рим, поглаварот на Римокатоличката црква изрази жалење за страдањата во светот. Во спомен на Исус Христос и неговите страдања, папата ја упати својата молитва на Велики петок до луѓето „кои во твое име трпат прогон во многу делови од светот; оние кои ја трпат драмата на војната и оние кои црпат сила од тебе и носат тешки крстови.“

Папата Франциско обично ја следи процесијата на лице место. Годинава, како и лани, 87-годишниот Фрациско, кој со месеци беше во лоша здравствена состојба, реши да не учествува на неа. За да го заштити своето здравје, тој сакал да ја следи богослужбата од неговата резиденција во Ватикан, соопшти Светата столица.

При процесијата се потсетува на страдањата и смртта на Исус Христос. Поворка минува покрај 14 станици околу Колосеумот, на кои е претставен патот на страдањето на Исус Христос - од неговата осуда на смрт, преку неговото распнување, до неговото погребување.