Володимир Зеленски неповреден по сообраќајка во Киев
15 септември 2022
Приватно возило во украинскиот главен град Киев се судрило со возилото на Володимир Зеленски и други автомобили од неговата колона, соопшти портпаролот на украинскиот претседател, Сергиј Никифоров ноќеска на Фејсбук. Санитетските работници од колоната му пружиле прва помош на возачот од возилото. Претседателот бил подложен на лекарски прегледи, но не се констатирани сериозни повреди.
Во тек е истрага за околностите на сообраќајната несреќа, истакна портпаролот Никифоров.
Зеленски вчера (14.09.2022) беше во посета на градот Изјум во регионот Харков, повторно освоен од страна на украинската војска во рамките на широката контраофанзива, каде присуствуваше на церемонија на подигање на украинското знаме.
Во својата кратка видео порака, објавена кратко по веста за сообраќајната несреќа, Зеленски изјави дека целиот регион Харков во меѓувреме е ослободен од рацете на руските окупатори. „На украинската армија ѝ успеа да го направи она што многумина го сметаа за невозможно“, истакна украинскиот претседател.
Украинската армија, според сопствени наводи, во изминатите неколку денови во својата контраофанзива забележа големи воени успеси во североисточниот регион Харков, исто како и на јужниот фронт во близина на градот Херсон на Црното Море. Под украинска контрола се вратени стотици населени места и неколку илјади квадратни километри површина.