Вработен во гимназија во Сански Мост уби тројца колеги

Тројца вработени во гимназија во Сански Мост, во Босна и Херцеговина, изутринава (21.08) се убиени од страна на свој колега. Напаѓачот пукал со автоматска пушка, а потоа се обидел да се самоубие.

Според медиумски извештаи, убиени се директорот на училиштето, една професорка и секретарката на гимназијата. Според изјави на очевидци, помошникот работник влегол во училиштето вооружен со пушка барајќи „одредени луѓе“.

„Пукањето се случило во 10 часот и 15 минути. Машкото лице Н.Н. со автоматско огнено оружје убило тројца вработени во училиштето. После тоа најверојатно се обидел да си пресуди себеси и се здобил со тешки телесни повреди. Префрлен е во Ургентниот центар Бања Лука. Полицијата е на лице место“, соопшти портпарол на полицијата.

Нема официјални информации за мотивите за нападот, но локалните медиуми шпекулираат дека напаѓачот се соочувал со дисциплинска постапка.