ЕУ бара намалување на издувните гасови
10 октомври 2018
По долги преговори на министрите за екологија на ЕУ во Луксембург, австриската министерка Елизабет Кестингер оцени дека заштитата на климата во Унијата е повторно на „лентата за претекнување“. Кестингер претседаваше со состанокот на министрите позветен на проблемот со ограничување на испуштањето јаглерод диоксид од возилата. Министрите во текот на изминатата ноќ донесоа заклучок емисиите на издувни гасови од новите автомобили до 2030 година да се намалат за 35% во однос на вредноста која ќе биде достигната во 2021-ва.
Повеќе: Мочуриштето во кое газат германските автопроизводители
Сега Министерскиот совет треба за новите гранични вредности да преговара со Европскиот парламент. Согласноста на земјите членки на Унијата и на ЕП е неопходно за да се донесат нови закони за заштита на климата. ЕП има поамбициозни цели. Парламентарците во преговори влегуваат со барање за намалување на издувните гасови за 40%. Планирано е „тријалогот“, во кој ќе учествува и Европската комисија, да биде завршен во март. Потоа пленумот на Парламентот би можел да гласа и тоа пред европските избори во мај 2019-та. Доколку тоа не успее, гласањето ќе биде одложено за долг период, сѐ додека не се конституира новиот ЕП. Со оглед на тоа што се смета со тешки преговори, разговорите почнуваат веќе денеска.
Потребни се повеќе електромобили
Редукцијата на издувни гасови нема да се определува за секое возило кое од 2030 година ќе се продава во ЕУ, туку за цела „флота“ на еден производител. Тоа значи дека автопроизводителот и натаму може да продуцира големи џипови кои голтаат многу гориво, доколку истовремено произведува и електромобил со нула емисии на издувни гасови. Важна е просечната вредност на сите продадени автомобили.
Повеќе: Дали е можна „поправка“ на дизелите?
Германската влада прави напори да ги поштеди малку германските производители, зашто Фолксваген, Мерцедес и БМВ каскаат во развојот на електромобили. Францускиот министер за екологија веќе бара целта да биде намалување на штетните гасови за 40%, со оглед на тоа што Ситроен и Пежо по прашањето на заштита на климата се понапред од германските производители.
ЕУ-дипломатите истовремено укажуваат дека емисиите на ЦО2 од автомобилите во Европа се одговорни за само 15% од загадувањето на климата. Во светски рамки погледнато, тоа се само неколку проценти, што значи само ситен дел од проблемот. Поважни во светски рамки, како што се вели, се емисиите од термоцентралите, индустријата и затоплувањето на зградите.