Бајерн доби можност да му се реваншира на Интер

Актуелниот европски првак Интер од Милано ќе игра против германскиот првак Бајерн Минхен во осминафиналето на фудбалската Лига на шампиони. Во реприза на минатосезонското финале, Бајерн доби шанса да се реваншираи за поразот од 2:0 во Мадрид.

Тренерот на Бајерн Луис Ван Гал беше задоволен од исходот на ждрепката. „Имаме сметки за расчистување со Интер. Ние ја имаме предноста поради тоа што реваншот ќе биде во Минхен, па затоа сум задоволен“, изјави Ван Гал.

Вториот германски претставник, Шалке ќе ги одмери силите со шпанската Валенсија. „Се работи за атрактивен, но тежок противник. Сепак, нашата цел е да одиме понатаму“, изјави тренерот на Шалке, Феликс Магат.

За издвојување е и двомечот меѓу Барселона и Арсенал, тимови кои и лани се сретнаа, но во четвртфиналето.

Во останатите дуели се среќаваат Тотенхем-Милан; Рома-Шахтјор; Лион-Реал Мадрид; Марсеј- Манчестер Јунајтед и Копенхаген- Челзи. Првите мечеви се на програмата на 15 и 16 и на 22 и 23 февруари, а реваншите на 8 и 9 и на 15 и 16 март.

Автор: БГ/дпа/макфакс

Редактор: Жана Ацеска