Блумберг фрли 500 милиони долари „во ветар“ и се повлече

Милијардерот Блумберг денеска од надежен кандидат се претвори во моќен поддржувач на поранешниот американски потпретседател Џо Бајден, кој извојува голема победа во битката да стане претседателски кандидат на Демократската партија на изборите на 3 ноември.
Блумберг, 78-годишен поранешен градоначалник на Њујорк и еден од најбогатите луѓе во САД, забележа очајни резултати на гласањето, победувајќи само во територијата Американска Самоа и покрај тоа што потроши 500 милиони долари на кампањата.
Најавувајќи дека се откажува од претседателската трка, тој го поддржа Бајден, кој пак сега се профилира како водечки кандидати наспроти самопрогласениот демократски социјалист, Берни Сандерс.

„Ќе работам на тоа тој да стане следниот претседател на САД“, соопшти Блумберг.

Во моментов е нејасно на кој начин Блумберг ќе го поддржи Бајден и што е следно во неговиот голем експеримент за политичко рекламирање. Запрашан како ќе изгледа поддршката, претставник на кампањата на Блумберг посочи на ветувањето дека инфраструктурата на неговата кампања ќе остане се до изборите во ноември за да им помогне на демократите да го поразат Трамп.

Блумбер го користеше рекламирањето како дел од неговата уникатна изборна стратегија во која го прескокна гласањето во неколку држави како и внатрепартиските дебати, а се фокусираше на гласањето во 14 држави на „Супер вторникот“.

Лавина од кеш

Откако влезе во кампањата на 24 ноември минатата година, Блумберг потроши стотици милиони долари на реклами. Во нив порачуваше дека ќе го совлада републиканецот Доналд Трамп на изборите во ноември, па неговата поддршка меѓу демократите и независните нарасна до 15%. Притоа тој вработи и илјадници луѓе во својата кампања, но не успеа да добие повеќе од 15% од поддршката во ниту една од 14 држави во кои се гласаше.
Но кампањата на Блумберг уште од почетокот се соочи со критики поради неговите минати политики кои многумина ги сметаа за расно дискриминаторски, како и за некои сексистички забелешки. Кога влезе во кампањата Блумберг објаснуваше дека стравува дека ниту еден од демократските кандидати нема да може да го совлада Трамп.
„Трамп ќе ги изеде“, изјави тој за телевизијата СиБиЕс, претставувајќи се себеси како „центрист“ наспроти „комунистот“ Сандерс. Блумберг остро го критикуваше Трамп, двајцата њујоршки милијардери си разменуваа навреди, а Трамп се исмејуваше со малиот број следбеници на Блумберг на Твитер нарекувајќи го „мини-Мајк“.

Своето богатство кое се проценува на околу 60 милијарди долари, Блумберг го заработи преку медиумската империја која ги снабдува фирмите на Вол Стрит со финансиски информации.

Иако во поголемиот дел од животот беше демократ, тој ја промени страната во 2001 кога беше избран за градоначалник на Њујорк со помош на републиканците. Во 2007 стана независен, а потоа во 2018 повторно се врати во јатото на демократите.