Да се зборува повеќе со Русија

Германската фудбалска репрезентација во Русија ја брани титулата светски шампион. Само 42 насто од Германците се убедени дека тоа ќе ѝ успее, покажа најновата анкета на институтот за истражување на јавно мислење Инфратест-димап. Голема анкета, „Трендови во Германија“, е спроведена во вторникот и во средата (12.-13.06.) - кога не можеше да се согледа дали спорот околу бегалската криза меѓу ЦСУ и ЦДУ ќе ескалира како што е случај сега.

Двете сестрински партии не се согласуваат околу прашањето дали бегалците кои веќе поднесоа барање за азил во некоја земја од ЕУ, треба да бидат вратени од германската граница.

Големо мнозинство е за протерување

Кога станува збор за бегалската политика, 86 отсто од Германците сметаат дека подоследно протерување на одбиените баратели на азил би било исправно, 69 насто од испитаниците се залагаат на бегалците наместо пари да им се дадат потребни работи, а 62 отсто- да не им се дозволи влез на бегалците во Германија без документи.

Иницијативата на минситерот за внатрешни работи да се отворат центри за „прифаќање на бегалците, одлучување за нивниот статус, како за нивна распределба по германските општини го поддржува 61 насто од населението, додека 31 процент го отфрлаат тоа.

Лоши оценки за владата

Кога станува збор за работата на владата, со неа „воопшто не се задоволни“ 20 отсто, додека „помалку задоволни“ се 43 насто од испитаниците.

Само 2 проценти се „многу задоволни“, а 35 отсто се „задоволни“ со работата на владата. Секој втор Германец е задоволен од работата на Ангела Меркел како канцеларка. Со работата на министерот за надворешни работо Хајко Мас се задоволни 44 насто од граѓаните, а со работата на министерот за внатрешни работи Хорст Зехофер- 23 отсто.

Кога утре би се одржале избори, ЦДУ/ЦСУ би добиле 31 насто од гласовите, СПД 18 отсто, а АфД- 15 насто. Зелените уживаат поддршка од 13 проценти, Партијата на левицата 10 насто, а Либералите- 8 отсто.

Фудбал

Канцеларката Ангела Меркел на Мундијалите во Бразил и во Јужноафриканската Република ги следеше натпреварите на германската репрезентација- 26 отсто од испитаниците сметаат дека сега тоа не би требала да го стори и во Русија, а 67 насто- оти би било добро да оди да ги следи. 42 проценти од Германците сметаат дека поради состојбата на човековите права во Русија и поради ситуацијата кај тамошните медиуми одлуката на оваа земја да и' се додели организација на Светско првенство е погрешна, а 45 отсто од нив велат дека одлуката е исправна.

59 насто од Германците го поздравуваат тоа што на Русија по анексијата на Крим ѝ се воведени санкции, а 34 проценти сметаат дека тоа е погрешно. 76 отсто од испитаниците сметаат оти претседателот на Русија Владимир Путин не бира средства за да ги спроведе руските интереси.

Околу 37 проценти од испитаниците би имале разбирање за тоа дека Запад за Русија претставува закана, но 88 насто од нив сметаат дека би било добро кога западните влади повеќе би разговарале со руската влада. Околу 93 отсто од населението смета оти Русија би требала повеќе да се потруди околу дијалогот со Запад.