Дали Грција е безбедна за новинарите?

„Убиството на новинари е гнасен и кукавички чин“, напиша на Твитер претседателката на Европската комисија. „Европа се залага за слобода. А слободата на медиумите е можеби најсвета од сѐ“, порача Урсула фон дер Лајен во реакцијата на убиството на грчкиот новинар. 

Јоргос Караиваз беше убиен пред својот дом во Атина преку ден, додека се враќал дома од работа. Караиваз работеше како репортер во областа за криминал на ТВ мрежата Стар. Познат е по своите извествувања за грчката полиција и за криминал. Тој уредуваше и интернет блог кој известува за овие теми.

Според наводите, двајца мажи на моторцикл, од кои еден бил во војничка облека, пукале во Караваиз најмалку шестпати додека новинарот излегувал од својот автомобил пред својот дом. Проценето е дека на местото на убиството се пронајдени 17 до 20 чаури, а деталите укажуваат оти убиците користеле пригушувач бидејќи соседите не ги слушнале истрелите. 

Приватната телевизија Стар за која работеше Караваиз објави дека на новинарот му пришле двајца мажи на моторцикл и пукале во него.

Грчките власти го осудија убиството и соопштија дека истрагата е во тек. 

Повеќе:

-Новинар на Дојче веле претепан на собир на Златна зора во Атина

-Насилството на десните екстремисти во Грција не запира

-Репортери без граници: Повеќе целно убиени новинари

И претставничката на ОБСЕ за слобода на медиумите, Тереза Рибеиро, меѓу другите, изрази шок поради убиството на новинарот Јоргос Караиваз кое се случи во Атина. „Новинарите би требало секогаш безбедно да ја извршуваат својата работа.

„Барам од грчките власти брзо да ги идентификуваат и да ги уапсат одговорните и јасно да го утврдат мотивот за овој страшен напад“, е наведено во соопштението на ОБСЕ.

Комесарката на Советот на Европа за човекови права, Дуња Мијатовиќ, ги повика властите итно и целосно да го истражат злосторството испита и да осигураат дека одговорните ќе бидат изведени пред лицето на правдата. На Твитер таа напиша дека убиството Караиваз е трагичен потсетник оти новинарството е опасна професија во Европа.

Редакциите на грчките медиуми често се цел на напади на вандали, но убиствата на новинари се релативно ретки во Грција.

Во јули сопственикот на таблоид Стефанос Киос преживеа по нападот од непознат напаѓач кој му пукал во вратот и во градите пред неговиот стан. Истрагата за овој случај е и натаму во тек. Менаџерот на радио, блогер и истражувачки новинар Сократис Гиолиас во 2010 година беше убиен пред својата куќа. Во тоа време наводно работел на една приказна за корупција. Одговорност за ова убиство презеде една левичарска група, но случајот никогаш не е решен.