По Келн: дискусии за консеквенциите

Сојузниот министер за правда Хајко Мас најави постра реакција на инцидентите од Келн и сличните од Хамбург. „Секој, кој мисли дека кај нас може да се стави над правото и законот, сосем се’ едно од каде доаѓа, мора да биде казнет“, рече тој во изјава за неколку весници. Баратели на азил можат да бидат протерани од Германија и во текот на постапката за давање азилако бидат осудени на казна затвор од најмалку една година, а таква казнена мерка е можна кај сексуалните деликти, уакажа министерот. Но, правни експерти се сомневаат дека е толку едноставно протерувањето на казнети азиланти. Многу држави одбиваат да примат назад свои државјани кои во Германија побарале азил и сториле кривично дело.

ЦСУ бара поостри закони

Чекор понатаму од министерот отиде Штефан Мајер, пратеник од фракцијата на ЦСУ во Бундестагот, кој побара заострување на законите кај можното протерување на странци - криминалци. Во наредниов период треба многу внимателно да се провери дали не се превисоки правните пречки за протерување на казнети странци. „Кој на толку срамен и одвратен начин го злоупотребува гостинското право, како сторителите од Келн, го губи правото да остане во нашата земја“, изјави Мајер за весникот „Билд“.

Отровна критика од Унгарија

Во извештаите на странските медиуми за настаните во Келн, во средиштето е и канцеларот Ангела Меркел. „Вол стрит Џорнал“ пишува: „Нападите во Германија се предизвик за бегалската политика на Меркел“. Италијанскиот весник „Република“ прашува: „Госпоѓо Меркел, каде сте?“ Според очекувањата, жестока е реакцијата во Унгарија, која е во отворен спор со Германија поради бегалската политика. Весникот „Маѓар Идок“ од Будумпешта, близок до владата, пишува дека се покажало „оти (германската) држава која се крие под исто ќебе со мигрантите, нема намера да ги штити нејзините граѓани од ордите што ги напаѓаат, туку се прилагодува на нивните норми“. Истиот весник во однос на Германците уште констатира: „Од нивните либерални принципи и од некакви си човекови права тие создадоа Штази (Штази - некогашната тајна служба на Источна Германија - н.з.) за медиуми, која ја надгледува медиумската диктатура. Резултат од тоа е дека германскиот печат се прави слеп кога омилените доселеници силуваат германски девојки“.

Шлаканица за медиумите и од самата Германија

Медиумите сега се на удар на критика и во самата Германија, иако во многу посуштински тон: генералниот секретар на ЦСУ Андреас Шојер во изјава за Дојчландфунк рече дека медиумите не известувале соодветно за нападите во Келн и можеби дури свесно не објавиле некои информации. „Луѓето кои се загрижени за нашето општество и како тоа се развива, го критикуват токму тоа дека делумно се објавени ставови кои не ја одразуваат реалноста, оти се мисли дека тука мора да се дејствува со погрешно сфатена претпазливост“. Но, де факто медиумите, првенствено локалните, вистински бргу известија за инцидентите и постојано со нагласување дека сторителите веројанто се млади по потекло од арапскиот и сверноафриканскиот регион.