Десетици повредени и приведени во немирите пред Собрание

Четириесет и седум полицајци се пожалиле на повреди, а десетина се посериозно повредени во инцидентите коишто се случија вечерва пред Собранието, каде што се одржуваа протести против францускиот предлог за кревање на бугарското вето. Полициски извори за ДВ потврдуваат дека се приведени десетина демонстранти, кои што учествуваа во насилните протести во кои е предизвикана и поголема материјална штета. 

Демонстрантите фрлаа со бекатон плочки, шишиња и се што ќе им се најдеше под рака, и кон полицијата, но и кон собраниската зграда во центарот на Скопје. Притоа е уништено едно полициско возило „шкода јети“, а демолирани се и двете куќички пред Собранието, наменети за припадниците на полицијата. Штети се предизвикани и на собраниската врата, искршени се и бројни прозорци од законодавниот дом и откорнати се бекатон плочки од патеката пред парламентот.