ДИК конечно преброја, поделбата на мандатите остана иста
16 јули 2020
Коалицијата предводена од СДСМ освоила најмногу гласови и најголем број пратенички места на десеттите парламентарни избори во земјата одржани во средата. По хакерскиот напад врз интернет-страницата еден час по завршувањето на гласањето и под засилен притисок од јавноста, ДИК со огромно задоцнување вечерва ги објави прелиминарните резултати.
Со 46 пратеници СДСМ ќе ја има најголемата група во парламентот, пред коалицијата околу ВМРО-ДПМНЕ која освои 44 мандати и вкупно 315 илјади гласови на изборите- 12 илјади помалку од коалицијата „Можеме“.
Со речиси 105 илјади освоени гласови, ДУИ ќе има 15 пратеници во Собранието, а блиску до неа е Алијансата на Албанците со 12 пратеници. Левица за првпат ќе има двајца пратеници, а ДПА еден.
На изборите гласале вкупно 942,334 граѓани, а 31 илјада во гласачката кутија ставиле неважечко ливче.