ЕСЧП: Задолжителното вакцинирање е неопходно
8 април 2021
Европскиот суд за човекови права, кому му се обратија родители на деца од Чешка кои не се примени во градинка поради тоа што не биле вакцинирани, оцени дека задолжителната вакцинација е „неопходна во демократско општество“. Чешката здравствена политика, како што се вели, е во „најдобар интерес“ на децата. Секое дете мора да се „заштити од тешки болести со вакцинирање или со постигнување колективен имунитет“, сметаат судиите во Стразбур. Оттука, обврската за вакцинирање не претставува повреда на членот 8 од Европската конвенција за човекови права.
Во Чешка децата мора задолжително да бидат вакцинирани против девет болести, меѓу кои дифтерија, тетанус, хепатитис Б, морбили... Повеќе родители, кои поради прекршување на обврската за вакцинирање на децата, мораа да платат казни или децата не им се примени во градинка, поднесоа тужба. Сега судот одлучи дека задолжителната вакцинација не претставува кршење на одредбите на Европската конвенција за човекови права кога станува збор за „правото на почитување на приватен живот“.
Повеќе:
Вакцинацијата против морбили задолжителна - конечно!
Задолжително вакцинирање или само задолжително советување?
„Политиката на вакцинација следи легитимни цели на заштита на здравјето, како и правата на другите, затоа што ги штити и оние кои примаат вакцини и оние кои не можат да бидат вакцинирани поради медицински причини“, истакнува судот и додава дека лицата кои не можат да примат вакцина „зависат од колективниот имунитет за да се заштитат од тешки заразни болести“. Затоа, Чешка „има голема слобода на проценка во тој контекст“, наведува судот, на чии одлуки не може да се вложи жалба.
Ова е прва пресуда на Европскиот суд за човекови права за обврска за вакцинирање на деца. Експертите сметаат дека таа пресуда ќе влијае на многу кампањи за вакцинација во различни земји. „Оваа пресуда ја зајакнува можноста за обврска за вакцинирање во услови на актуелната епидемија на Ковид-19“, оцени правниот експерт Никола Еврие за агенцијата АФП, кој ја следи работата на Европскиот суд за човекови права.