ЕУ-Западен Балкан: Потврда на перспективата, но без ветувања

Претставниците на ЕУ во Софија речиси едногласно го потенцираа значењето на Западниот Балкан за цела Европа, но, со ретки исклучоци, одбиваа да спомнуваат датуми кога се во прашање перспективите на земјите во регионот.

Германската канцеларка Ангела Меркел на прес-конференцијата тоа и отворено го потврди.

„Немам никакво мислење што се однесува до наведувањето на 2025 година како можна цел. Влегувањето (во ЕУ) мора да биде засновано на напредок. Не врз база на време, туку врз база на постигнатото и тоа посебно во областите владеење на правото, корупцијата, борба против организираниот криминал, отворени билатерални и гранични прашања...“, рече Меркел.

Единствено претседателот на Европскиот парламент Антонио Тајани имаше малку поинаков тон и застана во поддршка на 2025 година како датум кога, според негово мислење, треба да влезат Србија и Црна Гора.

Она што ЕУ не може да го вети во однос на перспективата за влез, ќе се обиде да го компензира со уште поголеми инвестиции во регионот.

Во завршната декларација на самитот јасно се укажува на „решеноста на ЕУ да го зајакне и интензивира својот ангажман на сите нивоа со цел да ѝ даде поддршка на политичката, економската и социјалната трансформација на регионот“.

Повеќе: ЕУ: Шест нови иницијативи за трансформација на Западен Балкан

ДВ веќе го објави планот којшто предвидува поддршка на Брисел во шест клучни сектори во регионот, кој би требало да опфати десетици проекти. Иако предлогот на Тајани за одобрување пакет од 10 милијарди евра инвестиции и помош за регионот засега е преоптимистички, сепак сите шест земји и тоа како ќе прифитраат од помошта на Брисел.

Проектот чиешто финансирање почна веднаш по минатогодишниот самит во Трст, сега ќе биде надополнет со нов, особено во сферата на транспорт и поврзаност.

Босна и Херцеговина ќе добие директна помош и поевтини кредити за изградба на четири проекти: медитерански коридор со Хрватска (Тарчин-Иван, две делници) којшто треба да стартува на средината од 2019 година, а да заврши до 2022 година. ЕУ ќе ја финансира и секцијата на автопатот Почитељ-Звировиќи во рамките на коридорот 5ц, како и делницата Буна-Почитељ.

Најголема поединечна директна помош (41,4 милиони евра) ЕУ им доделува на Србија и Косово, и тоа за изградба на делница од автопатот кој треба да ги поврзе Ниш и Приштина.

Македонија и Албанија ќе добијат екстра финансирање за да се поврзат со автопат и железница во рамки на Коридорот 8.

Најголемо охрабрување за земјите од регионот стигна од претседателот на Европскиот совет, Доналд Туск:

„ЕУ е и ќе остане најважен партнер на Западниот Балкан. Интеграцијата на регионот е основен приоритет на ЕУ, а Западниот Балкан е интегрален дел на Европа.“

Причина за задоволство на крајот имаше и домаќинот, бугарскиот премиер Бојко Борисов.

„Не знам дали во Софија некогаш имало толку претседатели, премиери, канцелари и банкари и претставници на европски институции“, рече Борисов.