Иванов целосно ја повлече аболицијата

Десет дена откако донесе одлука за делумно повлекување на аболицијата, македонскиот претседател Ѓорге Иванов одново се предомисли и одлучи во целост да ги повлече контроверзните помилувања на лица кои беа опфатени со скандалот со прислушкувањето.
„Во овие десет дена бевме сведоци на различни толкувања на оваа одлука на поларизираната политичка сцена и обиди да се освојат ситни дневно - политички поени преку оваа одлука за која како и тогаш, така и сега сум уверен дека ќе придонесе за национално помирување и ќе понуди излез од политичката криза во Република Македонија. Поради ова, денеска донесов одлука да ги поништам и преостанатите одлуки за помилување кои ги донесов на 12 април“, се наведува во соопштението од Кабинетот на Иванов.
Иванов се најде под голем притисок во домашната јавност и од меѓународниот фактор откако, на 12 април годинава, одлучи да аболицира вкупно 56 лица поврзани со случаите кои произлегуваат од прислушкуваните разговори.
Причината поради која повторно го сменил ставот е во фактот што во меѓувреме ниту едно од лицата за кои и натаму важеше аболицијата не побарало поништувањето на одлуката.
„Меѓутоа и покрај декларативните најави на дел од нив во јавноста дека ќе го сторат тоа, досега ниту еден од помилуваните не поднесе барање за поништување на одлуките за нивно помилување“, се наведува во соопштението.
На крајот на соопштението Иванов вели дека и натаму верува оти аболицијата била исправна одлука, но одлучил да ја повлече поради променетата политичка и безбедносна реалност во земјата.
„На крајот, уште еднаш ќе потсетам дека за разлика од 12 април, денеска имаме нова реалност во Македонија. Во услови на надворешни закани и безбедносни ризици, имаме функционални институции, кои можат да се справат со предизвиците“.