Израел се подготвува за вакцинирање со четврта доза

„Граѓаните на Израел беа први во светоткои ја примија третата доза од вакцината против Ковид-19 и пионери остануваме и со четвртата доза“, изјави премиерот Нафтали Бенет. Тој ги повика сите луѓе кои се постари од 60 години, како и медицинскиот персонал, да се вакцинираат.

Изјавите на Бенет доаѓаат по седницата на експертското тело на владата, кое заседаваше поради загриженоста околу ширењето на Омикрон-варијантата. Премиерот во врска со препораката на стручњаците за давање четврта доза рече дека е тоа „извонредна вест која ќе ни помогне да ја совладаме Омикрон-варијантата“.

Таканаречениот корона-кабинет во Израел постигна согласност и за нови ограничувања во земјата. За одделенијата во кои се вакцинирани само по неколку деца, а се во места со висока инциденција, треба да се врати онлајн-наставата. Освен тоа, од јануари родителите мора сами да ги плаќаат антигенските тестови за учениците. Договорени се и построги рестрикции за трговските центри.

Израел веќе го има зад себе четвртиот корона-бран, но бројот на инфицирани во последно време е повторно во пораст. Само уште 59% од Израелците се сметаат за целосно вакцинирани. Како целосно вакцинирани важат луѓето кои втората доза од вакцината ја добиле пред неполни шест месеци, како и луѓето кои имаат добиено бустер доза. 32% од населението воопшто не е вакцинирано, а кај околу 9% од граѓаните е истечена важноста на вакцината.