Кина прифаќа меѓународна истрага за потеклото на Ковид-19

Кинескиот министер за надворешни работи Ванг Ји ги осуди обидите на американски политичари да „фабрикуваат шпекулации“ за потеклото на вирусот и да ја „стигматизираат Кина“. Во последните неколку недели САД и Австралија повикаа на истрага за изворот на пандемијата. Американскиот претседател Доналд Трамп и шефот на дипломатијата Мајк Помпео ја обвинија Кина за недоволна транспарентност околу пандемијата, и повеќе пати споделуваа шпекулации дека вирусот протекол од кинеска лабораторија.
Повеќето научници веруваат дека вирусот потекнува од лилјак, а потоа преку друг цицач се пренел на човекот. Изворот досега се лоцираше во пазарот за диви животни во кинескиот град Вухан.

„Кине е подготвена на соработка со меѓународната научна заедница за да се испита изворот на вирусот“, изјави Ванг.

„Истовремено, веруваме дека таа треба да биде професионална, фер и конструктивна. Фер значи процес ослободен од политичко мешање, почитување за суверенитетот на сите држави и без презумпција на вина“, рече Ванг. 

- Повеќе на темата: Дали Сарс-Ков-2 е произведен во лабораторија?

Кинескиот виролошки институт, кој беше предмет на обвинувања од САД дека е извор на вирусот, соопшти дека поседува три живи видови на коронавирус од лилјак, но ниту еден не е истоветен со актуелниот Ковид-19.
Директорката на Институтот за вирологија во Вухан, Ванг Јанји изјави дека обвинувањата оти вирусот е произведен во лабораторија се „чиста фабрикација“.
„Ние во моментов имаме три видови на живи вируси од лилјаци, но најголемата сличност со Ковид-19 е 79,8 проценти“, вели таа.

Од лабораторијата во Вухан велат дека за првпат добиле примероци од новиот вирус на 30 декември минатата година, а до 2 јануари успеале да го откријат и геномот на вирусот.

„Како и сите други, ние немавме поим дека таков вирус постои. Како можел да протече од нашата лабораторија кога ние никогаш не сме го имале?“, рече Ванг.