Меј - единствена кандидатка за наследник на Камерон

Според изјавата која ја даде Андреа Лидсом, таа не чувствува доволно поддршка за водење силна и стабилна влада. Со нејзиното повлекување, сега како единствена кандидатка останува министерката за внатрешни работи Тереза Меј, најверојатно нов лидер на конзервативците, а со тоа и премиер.

При неочекуваното повлекување, Лидсом истакна дека Меј е во најдобра позиција „да го спроведе британскиот Брегзит под најповолно можни услови за британскиот народ.“ Таа вети целосна поддршка на Меј. „Во моментов ни е потребно силно водство кое ќе го реализира повлекувањето на земјата од ЕУ“, рече Лидсом. Тереза Меј денеска повторно одби спроведување втор референдум за останување на Обединетото Кралство во ЕУ, исто како и обид за повторен влез преку „мала врата“.

Промената на врвот побрзо од очекуваното

По откажувањето на Лидсом, Конзервативната партија планира побрзо именување на Меј за премиер. Постапката нема да трае девет недели, колку што првично се планираше, туку многу бргу ќе биде спроведена до крај, изјави претседателот на надлежната партиска комисија, Греам Брејди, без да наведува конкретен датум.

На веројатно идната премиерка Меј ќе ѝ припадне задачата да преговара со ЕУ и земјите членки околу деталите на британското повлекување од Унијата.

Британците на референдумот на 23 јуни со мнозинство гласови се изјаснија за „развод“ од ЕУ.