Очекувано фијаско во Кемниц

Со настапувањето на ноќта во саксонскиот град Кемниц, за многумина новинари завршува известувањето за настаните. Ситуацијата е премногу непрегледна, преопасна. Насекаде низ градот демнат групи на насилство подготвени десничарски радикали. Состојбата постојано ескалира. На еден репортер му беше скршен носот, човек пред вклучена камера демонстрира Хитлеров поздрав и врши притисок врз новинарите. Стотици нацисти, хулигани и насилни градски жители сакаат да ја растоварат својата агресија, жедни за инциденти. Полицијата е преоптоварена, недоволно бројно присутна. Ова не е добар ден за отвореното општество.

Повеќе:

Во Кемниц останува опасно

Организирана десничарска толпа

За да дојде до ваква ескалација, причината лежи во вчудувачкиот, но и поразувачки факт: во Германија, земјата на Хитлеровите злосторства, до денес постои погрешна проценка, минимизирање, па дури и акцентирање на десничарското насилство и заканите од организираните десничарски екстремисти. Ескалацијата во Кемниц е натамошен доказ, зашто таа е сѐ само не спонтана.

Повеќе:

Десничарскиот терор и потфрлањето на државата

Како Германија се бори со десничарскиот екстремизам?

Со години во Кемниц нацистите се организираат околу локалното фудбалско здружение. Името „NS Boys" кажува сѐ за нивната ориентација. Во одделни градски квартови, десничарските групи се обидуваат да обезбедат контрола врз улиците. Тие настапуваат со рутината на супкултура, вмрежена низ целата земја и разменуваат искуства. Ова се мали групи, но добро обучени и ефикасни. На таков начин, за многу кратко време можеа да се организираат и мобилизираат за маршот вчера, на 27. август 2018. година.

На полицијата ѝ беше позната мобилизацијата и постојните структури. Сепак, не стави на располагање дополнителни полициски единици заради обезбедување на сигурноста и редот. Политиката и службите едноставно не ја сфатија сериозно заканата. Зошто? Зашто мнозинството од службениците и политичарите не се лично во визирот на насилниците. Едноставно, недостига емпатија со жртвите.

Полицијата и политиката не сочувствуваат доволно со жртвите

Притоа, мора да се елиминира една опасна заблуда: омразата на овие луѓе на улиците не е насочена против бегалската политика или против Ангела Меркел. Таа е свртена против демократијата во Германија. Зашто, овој потпалувачки џган ги отфрла речиси сите параграфи од германскиот устав: човечкото достоинство, еднаквоста на граѓаните, забраната за дискриминација врз основа на религија, потекло или пол. Новите десничари со години се борат против политичките неистомисленици, луѓето со поинаква боја на кожата, а во изминатите години засилено - против муслиманите. Тие ја преземаат традицијата на Адолф Хитлер, го користат неговиот поздрав, ги величаат злосторствата на германскиот Вермахт во Втората светска војна и ги напаѓаат противниците каде можат. Нивна цел е повторно носење терор на улиците.

Фактичката голема опасност е што во изминатите години ваквите десничарски маршеви како во Кемниц, засилено се преплетуваат со протестите на разочараните и социјалните губитници. Овие последниве воглавно не се приврзаници на националсоцијализмот, но имаат опасна близина до расистичките и антидемократски идеологии. Тоа е алармирачки. Зашто, германската историја нѐ поучи докаде може да стигне организираната толпа, ако успее да се обедини со фрустрацијата и гневот на општеството. Значи, ова треба да биде предупредување до германската политика.