Приведени и повредени по насилните протести пред Собранието

Четвртиот ден од протестите против францускиот предлог за почеток на пристапните преговори со ЕУ донесе нова ескалација на насилствата, овојпат пред Собранието. Група демонстранти ја урнаа заштитната ограда и речиси еден час, не попречувани од никого, фрлаа со јајца, камења и други предмети кон собраниската зграда и полицискиот кордон кој го штитеше влезот во парламентот. 

Насилството запре дури откако полициски екипи одлучија да интервенираат и да ги избркаат насилните демонстранти од пред Собранието во правец кон паркот „Жена борец“ и Градскиот трговски центар. 

Протестите повторно започнаа пред Владата околу 19 часот, а оттаму се претворија во марш кој мина пред зградата на МНР, а заврши пред Собранието. 

Демонстрантите бараа оставка од владата и од министерот за надворешни работи Бујар Османи. 

Пред Собранието беше мирно се додека во еден момент група демонстранти не ја пробија заштитната ограда и се упатија кон влезот пред кој беше распореден полициски кордон. Демонстрантите, со качулки на главите и марами, не дојдоа во директен контакт со полицијата, но почнаа да маваат кон нив и кон зградата со јајца и камења. Секој искршен прозорец беше прославуван од публиката. 

По половина час, поголемиот дел од демонстрантите си заминаа, а пред Собранието останаа само најрадикалните кои продолжија да ја опсипуваат зградата со камења. За тоа сведочат и сликите од тротоарот пред Собранието каде се речиси соголени бекатон плочките кои беа користени како „муниција“. 

По интервенцијата на полицијата, демонстрантите се разбегаа. Неколкумина беа уапсени. Според непотврдени информации има и неколку повредени полицајци, но точната бројка засега не е позната.

На протести против францускиот предлог од саботата повикуваат двете опозициски партии ВМРО-ДПМНЕ и Левица. 

Погледнете повеќе во нашето видео од протестите: